ត្បូងឃ្មុំ៖ ការដ្ឋានជួសជុលផ្លូវ៣៧០ មានប្រវែងសរុប ២៩ ៥១៧ ម៉ែត្រ តភ្ជាប់ពីផ្លូវជាតិលេខ៧ នៃក្រុងសួង ឆ្លងកាត់ភូមិសាស្រ្តស្រុកត្បូងឃ្មុំ មកដល់ផ្លូវជាតិលេខ១១ ផ្សារអូររាំងឪ ស្រុកអូររាំងឪ បានកំពុងដំណើការ ក្រោមការគ្រប់គ្រង និងថែទាំដោយក្រសួងអភិវឌ្ឍន៍ជនបទ។ 

កន្លងមក ក្រសួងអភិវឌ្ឍន៍ជនបទធ្វើការជួសជុល ផ្លូវនេះ ដោយមានវឌ្ឍនភាពជានិច្ច គឺបានចាក់កៅស៊ូ រួចរាល់សរុបជាង៥០%រួចហើយ។ បច្ចុប្បន្នការដ្ឋានជួសជុលផ្លូវ ក៏កំពុងតែប្រព្រឹត្តទៅយ៉ាងសកម្មផងដែរ នៅក្នុងមូលដ្ឋានស្រុកអូរាំងឪ ដែលមានការឆ្លងកាត់ឃុំ ចំនួន ៤ រួមមាន ឃុំដំរិល ទួលសូភី ចក និងគងជ័យ ប្រវែងជាង ២០ ០០០ ម៉ែត្រ។ 

រដ្ឋបាលស្រុកអូររាំងឪ លើកឡើងថា ការដ្ឋានជួសជុលផ្លូវលេខ៣៧០ ក្នុងភូមិសាស្រ្តរបស់ខ្លួន បាននិងកំពុងដំណើរការទៅមុខជានិច្ច ក្នុងប្រវែងជាង ១០ ០០០ ម៉ែត្រ ក្នុងនោះកំណាត់ផ្លូវ ប្រវែងជាង ៤ ០០០ ម៉ែត្រ ចេញពីឃុំទូសូភី មកឃុំគងជ័យ បានលទ្ធផលប្រមាណ ៨៥% រួចហើយ។ ដោយឡែកដំណើរការជួសជុលដំណាក់កាលទីពីរ លើកំណត់ផ្លូវនៅសល់ប្រវែងប្រមាណ ៦ ០០០ ម៉ែត្រទៀត ចេញពីឃុំគងជ័យ ឆ្ពោះមកភ្ជាប់ផ្លូវជាតិលេខ៧ ទីប្រជុំជនស្រុកអូររាំងឪ ក៏នឹងចាប់ផ្តើមនៅក្នុងខែតុលាខាងមុខដែរ។ គម្រោងដែលនៅសល់នេះ ក្រសួងអភិវឌ្ឍន៍ជនបទនឹងបញ្ចប់នៅដើមឆ្នាំ២០២៦។

រដ្ឋបាលស្រុកអូររាំងឪ សូមធ្វើការបំភ្លឺជូនសាធារណជនមេត្តាជ្រាបថា កន្លងមកមានការផ្សព្វផ្សាយព័ត៌មានមិនពិតទាក់ទងនឹងការខិតខំប្រឹងប្រែងរបស់ថ្នាក់ដឹកនាំ មន្រ្តីរាជការ មន្ទីរ អង្គភាពពាក់ព័ន្ធ អាជ្ញាធរមូលដ្ឋាន និងប្រជាពលរដ្ឋ ដែលបានសហការ និងគាំទ្រដល់ដំណើរជួសជុលផ្លូវ៣៧០ នេះ ដែលសម្រាប់ជាប្រយោជន៍ដល់ការដឹកជញ្ជូនកសិផល ការធ្វើដំណើរ និងការបង្កើនសេដ្ឋកិច្ចមូលដ្ឋានបស់ប្រជាពលរដ្ឋ។ 

រដ្ឋបាលស្រុកសូមបដិសេធថា គម្រោងជួសជុលកំណាត់ផ្លូវ ដែលត្រូវជួសជុលបន្ថែមប្រវែង ៦ ០០០ ម៉ែត្រ គឺមានក្នុងគម្រោងដែលនឹងចាប់ផ្តើមដំណើរជាបន្តបន្ទាប់ឆាប់ៗនាពេលខាងមុខ។ សូមបញ្ជាក់ថា កំណាត់ផ្លូវនេះ បានរងការខូចខាត ដោយសារទឹកភ្លៀង និងការដឹកជញ្ជូនធ្ងន់ៗ នាពេលកន្លងមក។ ប៉ុន្តែទោះជាយ៉ាងណា កំណាត់ផ្លូវដែលខូចខាត ត្រូវបានក្រុមបច្ចេកទេសបានលើកជាគម្រោងជួសជុលរួចហើយ។ ដំណើរការដ្ឋានជួសជូលកំណាត់ផ្លូវនេះ នឹងធ្វើឡើងក្នុងអំឡុង ខែតុលា ឆ្នាំ២០២៥ និងបញ្ចប់នៅដើមឆ្នាំ២០២៦។ 

ជាមួយគ្នានេះ រដ្ឋបាលស្រុកអូររាំងឪ តាមរយៈក្រុមការងាររាជរដ្ឋាភិបាល ចុះមូលដ្ឋានខេត្តត្បូងឃ្មុំ ក្រុមការងារចុះមូលដ្ឋាន ស្រុកអូររាំង ដឹកនាំដោយ លោកមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តត្បូងឃ្មុំ បាននាំយកអំពូលសូឡា ចំនួន ៦១៤ ដើម ដែលជាអំណោយ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដើម្បីតម្លើងជូនប្រជាពលរដ្ឋ សម្រាប់បំភ្លឺតាមបណ្តោយផ្លូវលេខ៣៧០នេះ។

លោកបណ្ឌិត អ៊ាង សុផល្លែត បានថ្លែងថា បង្គោលភ្លើងសូឡាបំភ្លឺផ្លូវ គឺជា «ភ្លើងទេវតា» ដែលដើរដោយថាមពលពន្លឺព្រះអាទិត្យ ជូនប្រជាពលរដ្ឋ នៅតាមមូលដ្ឋានក្នុងខេត្តត្បូងឃ្មុំ នាពេលនេះ ពិតជាការចូលរួមចំណែក ជួយអភិវឌ្ឍនៅមូលដ្ឋាននានា សំដៅឆ្លើយតបទៅនឹងតម្រូវការចាំបាច់ ក្នុងការលើកកម្ពស់ជីវភាព របស់ប្រជាពលរដ្ឋក្នុងមូលដ្ឋាន ស្របតាមគោលនយោបាយ និងយុទ្ធសាស្រ្តរបស់រាជរដ្ឋាភិបាលកម្ពុជា។ 

សូមបញ្ជាក់ថា រដ្ឋបាលស្រុកអូររាំងឪ បានតម្លើងបង្គោលភ្លើងសូឡា តាមបណ្តោយផ្លូវលេខ៣៧០ ជាបណ្តើរៗរួចហើយ។ ជាមួយគ្នានេះ ប្រជាពលរដ្ឋបានសាទរយ៉ាងខ្លាំង ចំពោះសមិទ្ធផលថ្មីលើទឹកដីខេត្តត្បូងឃ្មុំ ដែលជាការយកចិត្តទុកដាក់លើសុខទុក្ខ និងកាត់បន្ថយការលំបាក របស់ប្រជាពលរដ្ឋ នៅគ្រប់មូលដ្ឋានទាំងអស់ របស់អគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជណាចក្រកម្ពុជា៕