រដ្ឋមន្ត្រីការពារជាតិអង់គ្លេសបាននិយាយថា រដ្ឋាភិបាលនឹងបណ្តាក់ទុនរាប់ពាន់លានផោនដើម្បីផ្លាស់ប្តូរចក្រភពអង់គ្លេសទៅកាន់ "ការត្រៀមខ្លួនប្រយុទ្ធ" នៅពេលប្រឈមមុខនឹងការគម្រាមកំហែងពីមហាអំណាចនុយក្លេអ៊ែរដូចរុស្ស៊ី និងចិន។

យោងតាមការចេញផ្សាយពី BBC News នាថ្ងៃទី០២ មិថុនា ឆ្នាំ២០២៥ នេះ រដ្ឋាភិបាលចក្រភពអង់គ្លេសបានទទួលយកអនុសាសន៍ទាំង 62 ដែលមានចែងនៅក្នុងការត្រួតពិនិត្យយុទ្ធសាស្ត្រការពារ (SDR) ដែលរង់ចាំជាយូរមកហើយ ដោយមានទាំងការកសាងនាវាមុជទឹកដើរដោយថាមពលនុយក្លេអ៊ែរថ្មីចំនួន 12 , រោងចក្រគ្រាប់បែកថ្មីចំនួន 6 និងបច្ចេកវិទ្យាដែលទទួលយកបានដូចជា បញ្ញាសិប្បនិម្មិត ជាដើម។ 

ក្នុងនោះយោងតាមប្រភពការពារជាតិមួយបានប្រាប់ BBC ថា ការប្តេជ្ញាចិត្តក្នុងការសាងសង់នាវាមុជទឹកវាយប្រហារថ្មីរហូតដល់ 12 គ្រឿងរបស់អង់គ្លេស នឹងតម្រូវឱ្យមានការកើនឡើងនៃការចំណាយលើវិស័យការពារជាតិដល់យ៉ាងហោចណាស់ 3% នៃផលិតផលក្នុងស្រុកសរុប។ រដ្ឋមន្ត្រីអង់គ្លេសបាននិយាយថា ពួកគេរំពឹងថានឹងចំណាយ 3% នៃ GDP លើវិស័យការពារជាតិនៅឆ្នាំ 2034 និងចុងឆ្នាំ 2034 ប៉ុន្តែមិនបានផ្តល់ការធានាទេ ហើយដំណើរការរហូតដល់ការចេញផ្សាយការពិនិត្យឡើងវិញ ត្រូវបានគ្របដណ្ដប់ដោយជម្លោះនយោបាយអំពីពេលដែលរដ្ឋាភិបាលនឹងឈានដល់ចំណុចសំខាន់។

លោក John Healey បានប្រាប់សមាជិកសភាកាលពីថ្ងៃច័ន្ទថា កងទ័ពរបស់ចក្រភពអង់គ្លេសត្រូវតែសាហាវជាង 10 ដង ដើម្បីប្រឈមមុខនឹងយុគសម័យថ្មីនៃការគំរាមកំហែង ។ លោកក៏បានផ្តល់សញ្ញាថា រដ្ឋាភិបាលគ្រោងនឹងបង្កើនទំហំកងទ័ពពី 74,400 នាក់ទៅយ៉ាងហោចណាស់ 76,000។

ការគ្រោងរៀបចំបែបនេះរបស់អង់គ្លេស ធ្វើឡើងបន្ទាប់ពីខ្លួនបានមើលឃើញពីការគម្រាមគំហែងពីប្រទេសមួយចំនួនដូចជាបញ្ហាសង្គ្រាមរវាងរុស្ស៊ីនិងអ៊ុយក្រែន ចិន អ៊ីរ៉ង់ និងកូរ៉េខាងជើង។ 

ដោយរដ្ឋមន្រ្តីអង់គ្លេសបានលើកឡើងថា ពេលនេះខ្លួនកំពុងប្រឈមមុខនឹងសង្គ្រាមនៅអឺរ៉ុប ការឈ្លានពានរបស់រុស្ស៊ី ហានិភ័យនុយក្លេអ៊ែរថ្មី និងការវាយប្រហារតាមអ៊ីនធឺណិតប្រចាំថ្ងៃជាដើម។ 

ដូច្នេះហើយដើម្បីប្រយុទ្ធប្រឆាំងនឹងបញ្ហាទាំងនេះ ក្រសួងការពារជាតិចក្រភពអង់គ្លេសត្រូវតែទទួលយកបច្ចេកវិទ្យាថ្មីៗដូចជា បញ្ញាសិប្បនិម្មិត មនុស្សយន្ត និងឡាស៊ែរដើម្បីត្រៀមទប់ទល់នឹងបញ្ហាផ្សេងៗដែលអាចកើតមានឡើងនៅក្នុងពិភពលោក។

ជុំវិញនៃការលើកឡើងខាងលើ លោក Keir Starmer នាយករដ្ឋមន្ត្រីចក្រភពអង់គ្លេសក៏បាននិយាយដែរថា នៅពេលដែលអង់គ្លេសកំពុងត្រូវបានគំរាមកំហែងដោយផ្ទាល់ដោយរដ្ឋដែលមានកងកម្លាំងយោធាជឿនលឿន មធ្យោបាយដ៏មានប្រសិទ្ធភាពបំផុតក្នុងការរារាំងរដ្ឋទាំងនោះគឺត្រូវត្រៀមខ្លួន ហើយបង្ហាញពួកគេដោយត្រង់ថា អង់គ្លេសត្រៀមខ្លួនរួចជាស្រេចដើម្បីផ្តល់សន្តិភាពតាមរយៈកម្លាំង៕