ប្រ៊ុចសែល/BANFF, កាណាដា/THE HAGUE, ថ្ងៃទី 23 ឧសភា (Reuters)៖ កាលពីថ្ងៃសុក្រ ទី២៣ ឧសភា ម្សិលមិញនេះ ប្រធានាធិបតីអាមេរិក Donald Trump បានគំរាម យកពន្ធ 50% លើទំនិញរបស់សហភាពអឺរ៉ុបចាប់ពីថ្ងៃទី 1 ខែមិថុនា និងព្រមានដាក់ពន្ធ 25% លើអ្នកដែលប្រើប្រាស់ iPhone នាំចូលទាំងអស់។

យោងតាមការចេញផ្សាយដោយ រ៉យទ័រ នាថ្ងៃទី២៤ ឧសភា នេះ ការគម្រាមកំហែងនឹងយកពន្ធនេះ ត្រូវបានចែកចាយតាមប្រព័ន្ធផ្សព្វផ្សាយសង្គម ដែលបានធ្វើឱ្យទីផ្សារពិភពលោកមានការភ្ញាក់ផ្អើលជាថ្មីម្ដងទៀត បន្ទាប់ពីលោក ត្រាំ បានបន្ធូរបន្ថយពីការយកពន្ធមួយចំនួនជាច្រើនសប្ដាហ៍កន្លងទៅ។
 
ពេលនេះ សន្ទស្សន៍ភាគហ៊ុនសំខាន់ៗរបស់សហរដ្ឋអាមេរិក និងភាគហ៊ុនអឺរ៉ុបបានធ្លាក់ចុះ ហើយប្រាក់ដុល្លារក៏បានធ្លាក់ចុះដូចគ្នា ខណៈពេលដែលតម្លៃមាសនៅតែបន្តកើនឡើង។ 

ការដាក់ពន្ធរបស់លោក Trump ប្រឆាំងនឹងសហភាពអឺរ៉ុបត្រូវបានជំរុញដោយជំនឿរបស់សេតវិមានដែលថា ការចរចាជាមួយប្លុកនេះមិនដំណើរការលឿនគ្រប់គ្រាន់ទេ។

ពេលនេះសង្គ្រាមពាណិជ្ជកម្មហាក់ក្រោករង្គោះរង្គើឡើងវិញ ដែលបានអង្រួនទីផ្សារ អាជីវកម្ម អ្នកប្រើប្រាស់ និងបង្កើនការភ័យខ្លាចនៃការធ្លាក់ចុះសេដ្ឋកិច្ចពិភពលោកម្ដងទៀត។

ហើយចំពោះការវាយប្រហាររបស់លោក ត្រាំ ទៅលើក្រុមហ៊ុន Apple គឺជាការប៉ុនប៉ងចុងក្រោយរបស់គាត់ ក្នុងការដាក់សម្ពាធទៅលើក្រុមហ៊ុននេះឱ្យផ្លាស់ទីផលិតកម្មទៅកាន់សហរដ្ឋអាមេរិក បន្ទាប់ពីក្រុមហ៊ុនផលិតរថយន្ត ក្រុមហ៊ុនឱសថ និងក្រុមហ៊ុនផលិតបន្ទះឈីប។ 

បើទោះជា ប្រជាជនអាមេរិកបានទិញទូរស័ព្ទច្រើនជាង ៦០លានគ្រឿងក្នុងមួយឆ្នាំយ៉ាងណាក៏ដោយ តែសហរដ្ឋអាមេរិកមិនបានផលិតស្មាតហ្វូនច្រើននោះទេ ហើយការផ្លាស់ប្តូរផលិតកម្មទំនងជានឹងបង្កើនតម្លៃ iPhones រហូតដល់រាប់រយដុល្លារឯណោះ។
 
គួរឲ្យដឹងថា កាលពីថ្ងៃសុក្រ លោក Trump បានប្រាប់អ្នកយកព័ត៌មាននៅខាងក្នុងការិយាល័យ Oval Office ថា ពន្ធដែលបានស្នើឡើងរបស់គាត់លើ Apple ក៏នឹងអនុវត្តចំពោះ "Samsung និងនរណាម្នាក់ដែលផលិតផលិតផលនោះ" ដែលជាក់ស្តែងសំដៅទៅលើស្មាតហ្វូន។ 

លោកបានបន្ថែមថា លោករំពឹងថាការដំឡើងពន្ធទូរស័ព្ទថ្មីនឹងមាននៅចុងខែមិថុនា ខាងមុខនេះ។
 
ក្នុងនោះ លោក Trump បានរំលឹកឡើងវិញនូវការត្អូញត្អែររបស់គាត់ដែលថា សហភាពអឺរ៉ុបបានប្រព្រឹត្តចំពោះសហរដ្ឋអាមេរិកយ៉ាងអាក្រក់ និងដាក់កម្រិតសហរដ្ឋអាមេរិកមិនឱ្យលក់រថយន្តចូលទៅក្នុងសហភាពអឺរ៉ុប។ 

Trump បានបញ្ជាក់ម្ដងទៀតថា ចំពោះការដាក់ពន្ធរបស់លោកនេះនឹងមិនមានកិច្ចព្រមព្រៀងទេ ដោយគាត់បានកំណត់កិច្ចព្រមព្រៀងនេះ វាគឺ 50% ប៉ុន្តែជាថ្មីម្តងទៀតគាត់បានបន្តថា គាត់នឹងមិនយកពន្ធទេ ប្រសិនបើពួកគេសាងសង់រោងចក្ររបស់ពួកគេនៅសហរដ្ឋអាមេរិក។

ក្នុងនោះ ប្រធានពាណិជ្ជកម្ម EU លោក Maros Sefcovic បាននិយាយថា គណៈកម្មការអឺរ៉ុប បានប្តេជ្ញាចិត្តយ៉ាងពេញលេញ ក្នុងការធានាបាននូវកិច្ចព្រមព្រៀងដែលដំណើរការសម្រាប់ភាគីទាំងពីរ បន្ទាប់ពីការហៅទូរស័ព្ទកាលពីថ្ងៃសុក្រជាមួយសមភាគីអាមេរិក លោក Jamieson Greer និងរដ្ឋមន្ត្រីក្រសួងពាណិជ្ជកម្មអាមេរិកលោក Howard Lutnick ។ លោកបានបន្ថែមថា EU-U.S. ពាណិជ្ជកម្ម "ត្រូវតែត្រូវបានដឹកនាំដោយការគោរពគ្នាទៅវិញទៅមក មិនមែនជាការគំរាមកំហែងនោះទេ។"

លើសពីនេះ ថ្លែងទៅកាន់អ្នកសារព័ត៌មាននៅទីក្រុងឡាអេ នាយករដ្ឋមន្ត្រីហូឡង់ លោក Dick Schoof បានគាំទ្រយុទ្ធសាស្ត្ររបស់សហភាពអឺរ៉ុបក្នុងកិច្ចចរចាពាណិជ្ជកម្ម ដោយគាត់បាននិយាយថា សហភាពអឺរ៉ុបទំនងជាមើលឃើញការប្រកាសចុងក្រោយនេះជាផ្នែកមួយនៃការចរចា។

គួរបញ្ជាក់ថា ចំពោះការយកពន្ធ 50% របស់ ត្រាំ ទៅលើការនាំចូលរបស់សហភាពអឺរ៉ុបអាចបង្កើនតម្លៃអ្នកប្រើប្រាស់លើអ្វីៗគ្រប់យ៉ាង ចាប់ពីរថយន្តអាល្លឺម៉ង់រហូតដល់ប្រេងអូលីវអ៊ីតាលី។ 

បើចំពោះការនាំចេញសរុបរបស់សហភាពអឺរ៉ុបទៅកាន់សហរដ្ឋអាមេរិកកាលពីឆ្នាំមុនវិញមានចំនួនសរុបប្រហែល 500 ពាន់លានអឺរ៉ូ (566 ពាន់លានដុល្លារ)  ដឹកនាំដោយប្រទេសអាល្លឺម៉ង់ (161 ពាន់លានអឺរ៉ូ), អៀរឡង់ (72 ពាន់លានអឺរ៉ូ) និងអ៊ីតាលី (65 ពាន់លានអឺរ៉ូ) ។ 

យោងតាមទិន្នន័យរបស់សហភាពអឺរ៉ុបបានឱ្យដឹងថា ឱសថ រថយន្ត និងគ្រឿងបន្លាស់រថយន្ត សារធាតុគីមី និងយន្តហោះ គឺជាទំនិញនាំចេញធំបំផុត៕