យោងតាមការចេញផ្សាយដោយសារព័ត៌មាន Vn Express បានឲ្យដឹងថា តារាបង្ហាញម៉ូតនិងជាតារាសម្ដែងវៀតណាម នាង ង៉ុក ឈិញ (Ngoc Trinh) ត្រូវបានឃុំខ្លួនកាលពីថ្ងៃព្រហស្បតិ៍ទី១៩តុលា ពីបទជិះម៉ូតូធំបង្កអសណ្តាប់ធ្នាប់សង្គម ហើយបង្ហោះសកម្មភាពនេះនៅលើអនឡាញឱ្យមនុស្សរាប់លាននាក់មើល។
ប៉ូលិសក្រុងធូឌឹក (Thu Duc) បានប្រកាសថា នាង ចាន់ ធី ង៉ុក ឈិញ (Tran Thi Ngoc Trinh) អាយុ ៣៤ ឆ្នាំនឹងត្រូវឃុំខ្លួនរយៈពេល ៣ ខែសម្រាប់ការស៊ើបអង្កេតលើបទចោទប្រកាន់ “រំខានដល់សណ្តាប់ធ្នាប់សាធារណៈ។”
គ្រូបង្វឹករបស់នាងឈ្មោះ ចាន់ វ៉ាន់ សុង (Tran Van Dong) អាយុ ៣៦ ឆ្នាំក៏ត្រូវបានចាប់ខ្លួនផងដែរពីបទ “បង្កើតត្រាឬឯកសារក្លែងក្លាយរបស់អង្គការមួយ ហើយប្រើប្រាស់វា។”
អាជ្ញាធរក៏បានឆ្មក់ឆែកឆេរផ្ទះរបស់នាងឈិញផងដែរ ហើយដកហូតឯកសារមួយចំនួន។
ការស៊ើបអង្កេតបានបង្ហាញថា នាងឈិញ ទោះបីជាមិនមានប័ណ្ណបើកបរម៉ូតូធំក៏ដោយ ក៏នៅតែសហការជាមួយលោកសុងជិះម៉ូតូធំម៉ាក BMW ដែលមានទំហំស៊ីឡាំង ៩៩៩ cm3 កាលពីថ្ងៃទី ៦ ខែតុលា នៅលើផ្លូវ D15 នៃតំបន់ Hi-Tech ក្នុងសង្កាត់តាងញ៉ុនភូប៊ីវ៉ាដ (Tang Nhon Phu B Ward) នៃទីក្រុងធូឌឹក។
ការឃុំខ្លួននេះធ្វើឡើងបន្ទាប់ពីកងកម្លាំងប៉ូលិសជាច្រើននាក់បានផ្ទៀងផ្ទាត់ព័ត៌មានអំពីនាងឈិញគ្រប់គ្រងម៉ូតូធំជាច្រើនគ្រឿង និងប្រព្រឹត្តិអំពើខុសច្បាប់នៅលើដងផ្លូវក្នុងទីក្រុងធូឌឹក (Thu Duc)។
ប៉ូលិសបាននិយាយថា នាងបានប្រព្រឹត្តអំពើដ៏គ្រោះថ្នាក់ ដូចជាដេក និងលុតជង្គង់លើម៉ូតូ ខណៈនាងមិនពាក់ឈុតការពារអ្វីឡើយ។
កាលពីដើមខែមុន លោកសុងក៏បានជួយនាងឈិញបើកម៉ូតូ Kawasaki Ninja នៅផ្លូវ Tran Bach Dang ក្នុងតំបន់ទីក្រុងធូធៀម (Thu Thiem) ផងដែរ ដោយបានធ្វើសកម្មភាពគ្រោះថ្នាក់ស្រដៀងគ្នា ដូចជាអង្គុយលើចំហៀងម៉ូតូឬព្រលែងដៃទាំងពីរពីចង្កូត។ នាងឈិញបានថតរាល់សកម្មភាពទាំងនេះ ហើយបង្ហោះវានៅលើបណ្តាញសង្គម៕
តើវាសនាតារាចម្រៀង រតនៈ ពិសី ទៅជាយ៉ាងណា ក្រោយសមត្ថកិច្ចបញ្ជួនទៅកាន់តុលាការ ពីបទ «ចេញសែកគ្មានប្រាក់»
ក្រុមសម្តែង «គ្រូតឿ» ផលិតមាតិកាវីដេអូរកលុយដោយឆីត្រីអណ្តែងទាំងរស់ ត្រូវបាននគរបាលហៅមកដុសក្លែលជាលើកទី២
