វ៉ាស៊ីនតោន៖ កាលពីថ្ងៃទី៩ កក្កដា ម្សិលមិញនេះ ប្រធានាធិបតីអាមេរិក លោក ដូណាល់ ត្រាំ បានប្រកាសពន្ធថ្មី ៥០% លើការនាំចូលទង់ដែងរបស់សហរដ្ឋអាមេរិក និងពន្ធ ៥០% លើទំនិញពីប្រទេសប្រេស៊ីល ដែលនឹងចាប់ផ្តើមនៅថ្ងៃទី ១ ខែសីហា ខាងមុខ។

ការប្រកាសនេះ បានធ្វើឡើងប៉ុន្មានម៉ោងបន្ទាប់ពី លោក ត្រាំ ក៏បានជូនដំណឹងដល់ប្រេស៊ីលដែរថា ពន្ធគយ ទៅវិញទៅមក របស់ខ្លួនដែលនឹងចូលនៅថ្ងៃទី ១ ខែសីហា នឹងមានការកើនឡើងពី ១០ ភាគរយ ទៅ ៥០ ភាគរយ ដែលនេះអាចចាត់ទុកថា ជាពន្ធកម្រិតខ្ពស់ ដ៏គួរឱ្យភ្ញាក់ផ្អើលសម្រាប់ប្រទេសដែលមានទំនាក់ទំនងពាណិជ្ជកម្មជាមួយសហរដ្ឋអាមេរិក។

លោក ត្រាំ បានអះអាងថា ពន្ធគយនេះ គឺដើម្បីដោះស្រាយ ទំនាក់ទំនងពាណិជ្ជកម្មមិនយុត្តិធម៌ និង ឱនភាពពាណិជ្ជកម្មមិនមានស្ថេរភាព បើទោះបីជាសហរដ្ឋអាមេរិកមានអតិរេកពាណិជ្ជកម្មចំនួន ៧,៤ ពាន់លានដុល្លារជាមួយប្រេស៊ីលក្នុងឆ្នាំ ២០២៤ យ៉ាងណាក៏ដោយ៕