ឡុងដ៍៖ មេដឹកនាំអង់គ្លេស កាណាដា និងបារាំង បានគំរាមដាក់ទណ្ឌកម្មលើអ៊ីស្រាអែល កាលពីថ្ងៃចន្ទម្សិលមិញ ប្រសិនបើអ៊ីស្រាអែលមិនបញ្ឈប់ការវាយលុកយោធាជាថ្មីនៅតំបន់ហ្គាហ្សា និងដកការរឹតត្បិតជំនួយ ដោយដាក់សម្ពាធបន្ថែមលើនាយករដ្ឋមន្រ្តី បេនចាមីន ណេតាន់យ៉ាហ៊ូ។

យោងតាមការចេញផ្សាយដោយ រ៉យទ័រ នាថ្ងៃទី២០ ឧសភា នេះ យោធាអ៊ីស្រាអែលបានប្រកាសចាប់ផ្តើមប្រតិបត្តិការថ្មីមួយនៅថ្ងៃសុក្រ ហើយមុននេះបន្តិចកាលពីថ្ងៃចន្ទកន្លងទៅ លោក Netanyahu បាននិយាយថា អ៊ីស្រាអែលនឹងគ្រប់គ្រងតំបន់ហ្គាហ្សាទាំងមូល។ 

ដោយក្នុងនោះអ្នកជំនាញអន្តរជាតិក៏ធ្លាប់បានព្រមានរួចហើយអំពីទុរ្ភិក្សនេះ។

សេចក្តីថ្លែងការណ៍រួមដែលចេញផ្សាយដោយរដ្ឋាភិបាលអង់គ្លេសបាននិយាយថា "ការបដិសេធរបស់រដ្ឋាភិបាលអ៊ីស្រាអែលចំពោះជំនួយមនុស្សធម៌សំខាន់ៗ ដល់ប្រជាជនស៊ីវិលគឺមិនអាចទទួលយកបាន និងជាហានិភ័យនៃការរំលោភលើច្បាប់មនុស្សធម៌អន្តរជាតិ" ។

ជាការឆ្លើយតប លោក Netanyahu បាននិយាយថា "មេដឹកនាំនៅទីក្រុងឡុងដ៍ អូតាវ៉ា និងប៉ារីស កំពុងផ្តល់រង្វាន់ដ៏ធំសម្រាប់ការវាយប្រហារប្រល័យពូជសាសន៍លើអ៊ីស្រាអែលនៅថ្ងៃទី 7 ខែតុលា កន្លងទៅ ខណៈដែលកំពុងគាំទ្រឱ្យមានអំពើឃោរឃៅបែបនេះបន្ថែមទៀត" ។ 

លោកបានបន្តថា អ៊ីស្រាអែលគ្រាន់តែការពារខ្លួនរហូតដល់ការទទួលបានជ័យជម្នះសរុបត្រូវបានសម្រេច និងបានបញ្ជាក់ឡើងវិញនូវលក្ខខណ្ឌរបស់អ៊ីស្រាអែលក្នុងការបញ្ចប់សង្គ្រាម ដែលរួមមានការដោះលែងចំណាប់ខ្មាំងដែលនៅសេសសល់ និងការរំសាយទ័ពនៅតំបន់ហ្គាហ្សា។

គួរបញ្ជាក់ថា អ៊ីស្រាអែលបានរារាំងការចូលនៃការផ្គត់ផ្គង់ផ្នែកវេជ្ជសាស្រ្ត អាហារ និងប្រេងឥន្ធនៈចូលទៅក្នុងតំបន់ហ្គាហ្សាចាប់តាំងពីដើមខែមីនា មកម្ល៉េះ ដើម្បីព្យាយាមដាក់សម្ពាធដល់ក្រុមហាម៉ាស់ ឱ្យដោះលែងចំណាប់ខ្មាំងដែលក្រុមសកម្មប្រយុទ្ធប៉ាឡេស្ទីនបានចាប់យកនៅថ្ងៃទី 7 ខែតុលាឆ្នាំ 2023 នៅពេលដែលកើតមានការវាយប្រហារសហគមន៍អ៊ីស្រាអែល។
 
បន្ថែមពីលើនេះ មេដឹកនាំលោកខាងលិចរួមមាន អង់គ្លេស កាណាដា និងបារាំង បាននិយាយនៅក្នុងសេចក្តីថ្លែងការណ៍រួមថា ពួកគេតែងតែគាំទ្រសិទ្ធិរបស់អ៊ីស្រាអែលក្នុងការការពារអ៊ីស្រាអែលប្រឆាំងនឹងអំពើភេរវកម្ម។ ប៉ុន្តែការកើនឡើងនេះគឺមិនសមាមាត្រទាំងស្រុងទេ ។

 មេដឹកនាំទាំងបីបន្ថែមថា ពួកគេនឹងមិនឈរនៅក្បែរនោះទេ ខណៈដែលរដ្ឋាភិបាលរបស់លោក Netanyahu បានបន្ត "សកម្មភាពដ៏អាក្រក់ទាំងនេះ"។

ទាំងនេះសបញ្ជាក់ថា មេដឹកនាំទាំងបីបានបញ្ជាក់ពីការគាំទ្ររបស់ពួកគេចំពោះកិច្ចខិតខំប្រឹងប្រែងដែលដឹកនាំដោយសហរដ្ឋអាមេរិក កាតា និងអេហ្ស៊ីបសម្រាប់បទឈប់បាញ់ភ្លាមៗនៅហ្គាហ្សា ដោយបាននិយាយថា ពួកគេប្តេជ្ញាទទួលស្គាល់រដ្ឋប៉ាឡេស្ទីនជាផ្នែកមួយនៃដំណោះស្រាយរដ្ឋពីរចំពោះជម្លោះ។

យោងតាមអាជ្ញាធរសុខាភិបាល Gaza បានឱ្យដឹងថា សង្រ្គាមផ្លូវគោក និងផ្លូវអាកាសរបស់អ៊ីស្រាអែលបានបំផ្លិចបំផ្លាញតំបន់ហ្គាហ្សា ដោយបានជម្លៀសអ្នកស្រុកស្ទើរតែទាំងអស់ និងបានសម្លាប់មនុស្សជាង 53,000 នាក់ ដែលភាគច្រើនជាជនស៊ីវិល។

គួរឲ្យដឹងបន្ថែមថា សង្រ្គាមនេះបានចាប់ផ្តើមជាមួយនឹងការវាយប្រហារចាប់តាំងពីថ្ងៃទី 7 ខែតុលា ឆ្នាំ 2023 មកម្ល៉េះ ដែលជាការវាយប្រហារដឹកនាំដោយក្រុមហាម៉ាស់ ដែលក្រុមសកម្មប្រយុទ្ធបានសម្លាប់មនុស្សប្រហែល 1,200 នាក់ ដោយភាគច្រើនជាជនស៊ីវិល និងបានចាប់ចំណាប់ខ្មាំងចំនួន 251 នាក់ នេះបើយោងតាមចំនួនសរុបដែលត្រូវបានបង្ហាញដោយអ៊ីស្រាអែល៕