ព្រះវិហារ៖ ព្រឹត្តិការណ៍រត់ឆ្លងកាត់ឧបសគ្គ «Preah Vihear Temple Run» លើកទី៣ ឆ្នាំ២០២៥ ត្រូវបានរៀបចំឡើងយ៉ាងមហាឡារិក ដើម្បីរំលឹកថ្ងៃជាប្រវត្តិសាស្ដ្រ ក៏ដូចជាចូលរួមអបអរសាទរខួប ១៧ឆ្នាំ នៃការដាក់បញ្ចូល «ប្រាសាទព្រះវិហារ» ក្នុងបញ្ជីសម្បត្តិបេតិកភណ្ឌពិភពលោក របស់អង្គការយូណេស្កូ (០៧ កក្កដា២០០៨ - ០៧ កក្កដា ២០២៥)។
ព្រឹត្តិការណ៍នេះបាននាំអ្នកចូលរួមទាំងអស់ រត់ឆ្លងកាត់ឧបសគ្គដ៏សប្បាយរីករាយ និងពោពេញដោយការផ្សងព្រេង ឆ្ពោះទៅកាន់សំណង់ស្ថាបត្យកម្មដ៏អស្ចារ្យ និងជារមណីយដ្ឋានប្រវត្តិសាស្ត្រដ៏ល្បីល្បាញ គឺប្រាសាទព្រះវិហារ ដែលកំពុងឈរបង្ហាញខ្លួនយ៉ាងសង្ហានៅលើកំពូលភ្នំដងរ៉ែក។
ការរត់អបអរសាទរប្រាសាទព្រះវិហារលើកទី៣នេះ នឹងមានការបែងចែកជា៤ ដូចជា វិញ្ញាសារដើរដី ១ ៣០០ម៉ែត្រ «យាត្រាបេតិកភណ្ឌ-PREAH VIHEARR TEMPLE WALK», វិញ្ញាសារត់ ចំងាយ ៩ គីឡូម៉ែត្រ «ផ្លូវរត់ឌីទេពសែនជ័យ-DY TEP SENCHEY TRAIL», វិញ្ញាសារត់ ចំងាយ ២២.៦ គីឡូម៉ែត្រ «ផ្លូវសួគ៌ាល័យ-SOURKEA TRAIL» និង វិញ្ញាសារត់ ចំងាយ ៤២.៥ គីឡូម៉ែត្រ «ផ្លូវរត់ជញ្ជាំងដងរែក-DANGREK TRAIL»។ ចំពោះលើវិញ្ញាសានីមួយៗ មានផែនទីនៃការរត់ និងពេលវេលារត់ខុសៗគ្នាដែលបានកំណត់ដោយក្រុមការងាររៀបចំព្រឹត្តិការណ៍ RUN with SAI ។
សូមជំរាបជូនថា ព្រឹត្តិការណ៍ «រត់អបអរសាទរប្រាសាទព្រះវិហារ» លើកទី៣ ជាព្រឹត្តិការណ៍ដែលសហការរៀបចំដោយក្រុមការងារ RUN WITH SAI ជាមួយអាជ្ញាធរជាតិព្រះវិហារ និងសហការគាំទ្រដោយ ក្រសួងវប្បធម៌ និងវិចិត្រសិល្ប: រដ្ឋបាលខេត្តព្រះវិហារ សហភាពសហព័ន្ធយុវជនកម្ពុជា។ ព្រឹត្តិការណ៍នេះ នឹងនាំអ្នកចូលរួមសិក្សាស្វែងយល់ពីភាពអស្ចារ្យ និងតម្លៃជាសារវ័ន្តនៅក្នុងស្ថាបត្យកម្មនៃប្រាសាទព្រះវិហារ ភាពស្រស់ស្អាតនៃបរិស្ថានធម្មជាតិ តាមបណ្ដាតម្រាយផ្លូវរត់ ក្នុងវិញ្ញាសានីមួយៗ នៃព្រឹត្តិការណ៍រត់អបអរសាទរប្រាសាទព្រះវិហារ ឆ្នាំ២០២៥ ក្នុងន័យលើកតម្លៃប្រាសាទដែលជាបុព្វបុរសខ្មែរ និងជាឱកាសដល់អត្តពលិក បានបញ្ចេញទេពកោសល្យ បច្ចេកទេស និងសមត្ថភាព ដើម្បីត្រៀមខ្លួនដែលកម្ពុជាធ្វើជាម្ចាស់ផ្ទះ នៃព្រឹត្តិការណ៍កីឡាយុវជនអូឡាំពិកឆ្នាំ២០២៩ខាងមុខ។
អមជាមួយនឹងព្រឹត្តិការណ៍នេះ រួមមានកម្មវិធីទស្សនីយភាព ការសម្តែងរបាំប្រពៃណី ឧបករណ៍ប្រពៃណីខ្មែរ និងរបាំប្រចាំតំបន់នៅប្រាសាទព្រះវិហារ ដើម្បីស្វាគមន៍ដល់កីឡាករ កីឡាការិនី ទាំងអស់ដែលរត់ដល់ទីបានជោគជ័យ ក៏ដូចជាការផ្តល់នូវអនុស្សាវរីយ៍ និងការចងចាំដ៏ល្អរួមគ្នា នៅលើប្រាសាទព្រះវិហារ ដ៏ពិសិដ្ឋមួយនេះដែរ។ បន្ថែមពីសកម្មភាពរត់ ក្រុមការងារក៏មានរៀបចំកម្មវិធីអមនៃកម្មវិធី គឺការដាំកូនឈើ ដើម្បីជាចូលរួមថែរក្សាបរិស្ថានផងដែរ៕
ការប៉ះទង្គិចគ្នានៅប្រាសាទតាក្របី! ក្រសួងការពារជាតិកម្ពុជា បញ្ជាក់ថា៖ «ទង្វើរបស់ភាគីយោធាថៃ ដែលហាមឃាត់ពលរដ្ឋកម្ពុជាមិនឱ្យប្រើក្រមាប៉ាក់រូបទង់ជាតិ គឺជាទង្វើមិនគោរពច្បាប់ទម្លាប់!»
