ភ្នំពេញ៖ ក្លិប​បាល់ទាត់​ព្រះ​ខ័នរាជ​ស្វាយរៀង បាន​តែង​តាំង​លោក Mathew McConkey ជា​គ្រូ​បង្គោល​ថ្មីក្រោយការចាកចេញរបស់លោក Pep ។

លោក Mathew សញ្ជាតិ អៀរឡង់ ​មាន​​អាជ្ញា​ប័ណ្ណ​កម្រិត​ UEFA A Licence និង​​មាន​បទពិសោធជា​ច្រើនដែល​លោក​ធ្លាប់​បាន​​ធ្វើ​​ជាគ្រូជំនួយ​នៅ​ព្រះខ័នរាជ​ស្វាយរៀង​រយៈ​ពេល​​៤រដូវកាលរួចមកហើយ។ ដូច្នេះមាន​ន័យ​ថា លោក​មាន​បទពិសោធ និង​យល់​ច្រើន​ពី​ស្ថានភាព​បាល់ទាត់​កម្ពុជា និង​ក្រុម​ការងារ​នៅ​ក្លិបក៏ដូចជាកីឡាករ។

មុន​ពេល​​ធ្វើជា​គ្រូ​ជំនួយ​ក្លិប​ព្រះ​ខ័ន​រាជ​ស្វាយរៀង​កាល​ពី​៤​ឆ្នាំ​មុន លោក Mattew McConkey ធ្លាប់​បាន​ធ្វើ​ជា​គ្រូ​បង្វឹក​ក្រុម 4 Corner Coaching ​ចន្លោះ​ពី​ឆ្នាំ​២០១៧ ដល់ ២០២១ ​ព្រម​ទាំង​ជាគ្រូ​បង្ហាត់​នៅ​តំបន់​របស់​ក្លិប Swansea City Football Club ពី​ឆ្នាំ​២០២០ ដល់ ២០២១៕

 គួររំលឹកថា ជាការពិតមុនការចាកចេញរបស់លោក Pep បានធ្វើឲ្យក្លិប ក៏ដូចជាអ្នកគាំទ្រមានការសោកស្ដាយជាខ្លាំង ដ្បិតគេទទួលស្គាល់ពីសមត្ថភាព និងយុទ្ធសាស្ដ្រនៃការដឹកនាំក្រុមដ៏ខ្លាំងរបស់លោក រហូតឈ្នះជើងឯកលីគកំពូលកម្ពុជា ២សម័យជាប់គ្នា ហើយឈ្នះជើងឯក និងជើងឯករងពានសម្ដេចតេជោ ហ៊ុន សែន សម្រាប់ ២រដូវកាលចុងក្រោយទៀតផង។

 អ្វីដែលគួរឲ្យភ្ញាក់ផ្អើល គឺបុរសសញ្ជាតិអេស្ប៉ាញរូបនេះ បានបន្សល់នូវកំណត់ត្រាប្រវត្តិសាស្ដ្រមួយសម្រាប់ក្លិប មុនចាកចេញ គឺការជួយស្វាយរៀង ទទួលបានជើងឯករង នៃពានរង្វាន់កម្រិតទី៣ ទ្វីបអាស៊ី AFC Challenge League 2024/25 កាលពីថ្មីៗ។

យ៉ាងណាក្រោយទទួលបានជោគជ័យជាច្រើន ក្នុងការដឹកនាំក្លិបមានមូលដ្ឋាននៅខេត្តស្វាយរៀង ២រដូវកាលកន្លងមក លោកក៏សម្រេចចិត្តចាកចេញ ហើយក្លិបក៏គោរពតាមការសម្រេចចិត្តនេះផងដែរ ហើយក្លិបក៏ជ្រើសរើសបានគ្រូបង្វឹកថ្មីរួចរាល់ ដើម្បីបន្ដដឹកនាំក្រុមត្រៀមធ្វើការប្រកួត ទាំងក្នុង និងក្រៅប្រទេស សម្រាប់រដូវកាលថ្មី ខាងមុខ ដោយក្លិបនឹងធ្វើការប្រកាសជាផ្លូវការ នៅរសៀលថ្ងៃទី៣ ខែមិថុនានេះ។