នគរបាលបានឱ្យដឹងថា នៅថ្ងៃទី៣០ ខែមេសា ឆ្នាំ២០២៥ វេលាម៉ោង ០៨និង៤០នាទី នៅចំណុច មុខអាផាតមិនផាមហោស៍ ស្ថិតតាមបណ្តោយផ្លូវ៦៣ ភូមិ៨ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ មានជនសង្ស័យ ចំនួន ០៣នាក់ ភេទប្រុស ជិះម៉ូតូ ០១គ្រឿង ម៉ាក Honda Scoopy ពណ៌ខ្មៅ ពាក់ស្លាកលេខ ភ្នំពេញ 1LJ-0371 បានធ្វើសកម្មភាពឆក់កាបូបបានសម្រេចពីជនរងគ្រោះឈ្មោះ EMMA BOOCK JENSEN ភេទស្រី អាយុ ១៩ឆ្នាំ ជនជាតិដាណាម៉ាក រួចគេចខ្លួនបាត់ស្រមោល។
នគរបាលព្រហ្មទណ្ឌបានឱ្យដឹងទៀតថា ចំពោះសម្ភារៈបាត់បង់រួមមាន៖ លិខិតឆ្លងដែន ០១ក្បាល, ទូរសព្ទ ០១គ្រឿង ម៉ាក IPHONE 15 PRO ពណ៌ស, លុយខ្មែរចំនួនប្រហែល ៣០មឺនរៀល, លុយដុល្លារប្រហែល ៨០ដុល្លារអាមេរិក និងកាតធនាគារ Darsk Bank ០១សន្លឹក។
ក្រោយពីមានហេតុការណ៍ខាងលើកើតឡើង ដោយអនុវត្តតាមបទបញ្ជារបស់លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ, កម្លាំងជំនាញរបស់នាយកដ្ឋាននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន, លោកវរសេនីយ៍ឯក ឆាន់ គីមលី និងលោកវរសេនីយ៍ឯក ហែម បូណា អនុប្រធាននាយកដ្ឋាននគរបាលព្រហ្មទណ្ឌ បានដឹកនាំសហការជាមួយអធិការដ្ឋាននគរបាលខណ្ឌបឹងកេងកង និងខណ្ឌច្បារអំពៅ ដោយបានធ្វើការស្រាវជ្រាវតាមនីតិវិធី និងជំនាញ រហូតកំណត់បានអត្តសញ្ញាណ និងទីតាំងលាក់ខ្លួនរបស់ជនសង្ស័យដែលបានប្រព្រឹត្តបទល្មើសខាងលើ។
លុះនៅថ្ងៃទី០២ ខែឧសភា ឆ្នាំ២០២៥ វេលាម៉ោង ២១និង៤០នាទី កម្លាំងជំនាញបានបន្តដឹកនាំសហការ ដោយឃាត់ខ្លួនបានជនសង្ស័យ ចំនួន០៤នាក់រួមមាន៖ ទី១. ឈ្មោះ ផុន សិលា ភេទប្រុស អាយុ ២៧ឆ្នាំ ជនជាតិខ្មែរ , ទី២. ឈ្មោះ វ័ន្ត ឌីណា ភេទប្រុស អាយុ ១៧ឆ្នាំ ជនជាតិខ្មែរ, ទី៣. ឈ្មោះ ពង្ស ផែន ភេទប្រុស អាយុ២០ឆ្នាំ ជនជាតិខ្មែរ និង ទី៤. ឈ្មោះ រុំ ម៉ៃ ភេទប្រុស អាយុ ១៨ឆ្នាំ ជនជាតិខ្មែរ ត្រង់ចំណុចសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។
ក្រោយពីសាកសួរជនសង្ស័យបានឆ្លើយសារភាពដូចគ្នាថា «កាលពីថ្ងៃទី៣០ ខែមេសា ឆ្នាំ២០២៥ ពួកខ្លួនពិតជាបានធ្វើសកម្មភាពជិះម៉ូស្កុបពីពណ៌ខ្មៅឆក់កាបូបនារីរងគ្រោះជនជាតិបរទេសពិតប្រាកដមែន។ ប៉ុន្តែវត្ថុតាងពួកខ្លួនបានយកទៅបោះចោលអស់ហើយ»។
បច្ចុប្បន្ន ជនសង្ស័យខាងលើត្រូវបាននាយកដ្ឋាននគរបាលព្រហ្មទណ្ឌ ប្រគល់ជូនអធិការដ្ឋាននគរបាលខណ្ឌបឹងកេងកងកសាងសំណុំរឿងតាមនីតិវិធីបន្ត៕
គិតត្រឹមត្រីមានទី១ ឆ្នាំ២០២៥ សារព័ត៌មានជាតិ-បរទេស ដែលកំពុងដំណើរការផ្សាយ សរុបចំនួន ១ ៦២០ អង្គភាព បានចុះបញ្ជីនៅក្រសួងព័ត៌មាន
ការចរចាលើកិច្ចព្រមព្រៀងពាណិជ្ជកម្មបដិការរវាងកម្ពុជា និងសហរដ្ឋអាមេរិក នឹងប្រព្រឹត្តទៅដោយផ្ទាល់នៅថ្ងៃទី១៤-១៥ ខែឧសភា នៅរដ្ឋធានីវ៉ាស៊ីនតោន
