ស្ទឹងត្រែង៖ ពិធី «បុណ្យផ្សោតមេគង្គ និងព្រឹត្តិការណ៍អុំទូកកៃយ៉ាក លើកទី១» នឹងប្រព្រឹត្តទៅមានរយៈពេល៣ថ្ងៃ ចាប់ពីថ្ងៃទី៣០-៣១ ខែឧសភា ដល់ថ្ងៃទី០១ ខែមិថុនា ឆ្នាំ២០២៥ ខាងមុខនេះ នៅសហគមន៍អេកូទេសចរណ៍ព្រះរំកិល អន្លង់ផ្សោតឈើទាល ស្ថិតនៅភូមិអន្លង់ស្វាយ ឃុំព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង។

ការរៀបចំពិធី «បុណ្យផ្សោតមេគង្គ និងព្រឹត្តិការណ៍អុំទូកកៃយ៉ាក លើកទី១» នេះ ក្រោមកិច្ចសហការរវាងក្រសួងទេសចរណ៍ ជាមួយរដ្ឋបាលខេត្តស្ទឹងត្រែង ក្នុងគោលបំណង ដើម្បីលើកកម្ពស់ការអភិរក្សផ្សោតមេគង្គ ផ្សព្វផ្សាយតំបន់សក្តានុពលអេកូទេសចរណ៍ សកម្មភាពទេសចរណ៍ ឱ្យកាន់តែសម្បូរបែប និងពង្រឹងគុណភាពផលិតផល សេវាកម្មទេសចរណ៍ឱ្យស្របតាមស្តង់ដាទេសចរណ៍ ព្រមទាំងលើកទឹកចិត្តដល់ប្រជាពលរដ្ឋ ឱ្យចូលរួមយ៉ាងសកម្មក្នុងការអភិរក្សធនធានធម្មជាតិ អនាម័យបរិស្ថាន សំដៅទាក់ទាញកំណើន នៃភ្ញៀវទេសចរជាតិ និងអន្តរជាតិបន្ថែមទៀត។

អមក្នុងព្រឹត្តិការណ៍នេះ រួមមាន៖ ១- ពិធីបុណ្យផ្សោតមេគង្គ (ពិធីសូត្រមន្ត), ២- កម្មវិធីអុំទូកកៃយ៉ាក, ៣- ការតាំង ពិព័រណ៍ផលិតផលសហគមន៍អេកូទេសចរណ៍ និងម្ហូបអាហារប្រចាំតំបន់, ៤- សកម្មភាពកីឡាទេសចរណ៍ជាលក្ខណៈ មហាជន (រត់ម៉ារ៉ាតុន ដើម្បីសប្បុរសធម៌ ប្រណាំងទូកជាដើម), ៥- ការបោះតង់ជំរំទេសចរណ៍នៅលើកោះលន និងកោះទន្សាយ, ៦- ទស្សនកិច្ចសហគមន៍អេកូទេសចរណ៍បុរីអូរស្វាយ (ស្តូបប្រវត្តិសាស្ត្របណ្ណាល័យហ្លួងម៉ែ) និង៧- ទស្សនកិច្ចទឹកធ្លាក់សុភ័ក្រមិត្ត។

ក្រសួងទេសចរណ៍ ក៏បានអំពាវនាវដល់ លោក លោកស្រី អ្នកនាង កញ្ញា និងសាធារណជនទាំងអស់ចូលរួមឱ្យបានច្រើនកុះករ ជាពិសេសរួមគ្នាជំរុញ ផ្សព្វផ្សាយ និងលើកកម្ពស់វិស័យទេសចរណ៍នារដូវកាលបៃតង «Green season» ស្របតាមយុទ្ធនាការផ្សព្វផ្សាយ “ទេសចរណ៍ ដើម្បីទាំងអស់គ្នា ទាំងអស់គ្នា ដើម្បីទេសចរណ៍” “ទេសចរណ៍រីកលូតលាស់ក្នុងសន្តិភាព” និង “បុគ្គលម្នាក់ៗជាអ្នកផ្សព្វផ្សាយទេសចរណ៍កម្ពុជាម្នាក់”៕