បាងកក៖ អគ្គស្នងការនគរបាលជាតិរបស់ប្រទេសថៃបានបញ្ជាឱ្យមានការស៊ើបអង្កេតមួយ បន្ទាប់ពីនាយករដ្ឋមន្ត្រីថៃ ប៉ាតុនថាន ស៊ីណាវ៉ាត្រា (Paetongtarn Shinawatra) បានបង្ហាញថា លោកស្រីត្រូវបានគេកំណត់គោលដៅដោយអ្នកបោកប្រាស់ដែលប្រើបច្ចេកវិទ្យា AI ដើម្បីក្លែងធ្វើជាមេដឹកនាំបរទេស យោងតាមការចេញផ្សាយពីគេហទំព័រKhaosod English នាថ្ងៃទី ១៦ ខែ មករា ឆ្នាំ២០២៥ នេះ។

ថ្លែងនៅក្នុងកិច្ចប្រជុំថវិកានៅឯ IMPACT Muang Thong Thani កាលពីថ្ងៃទី ១៥ ខែមករា នេះ នាយករដ្ឋមន្ត្រី Paetongtarn បានចែករំលែកនូវបទពិសោធន៍របស់លោកស្រីអំពីការធ្លាក់ខ្លួនជាជនរងគ្រោះទៅនឹងការបោកប្រាស់ នៃមជ្ឈមណ្ឌលហៅទូរស័ព្ទដែលស្មុគ្រស្មាញខុសពីធម្មតា។ 

អ្នកបោកប្រាស់បានប្រើ AI ដើម្បីក្លូនសំឡេងរបស់មេដឹកនាំបរទេសក្នុងការប៉ុនប៉ងស្នើសុំការបរិច្ចាគថវិការ។

ក្នុងនោះ នាយករដ្ឋមន្រ្តីថៃបានរៀបរាប់ថា "ពួកគេបានផ្ញើសារជាសំឡេងដោយនិយាយថា 'Good Morning Prime Minister Thailand' ហើយបង្ហាញចំណាប់អារម្មណ៍ក្នុងការសហការគ្នា"។
 «បន្ទាប់ពីការសន្ទនាគ្នាមួយចំនួន ពួកគេបានអះអាងថា ប្រទេសថៃ គឺជាប្រទេសអាស៊ានតែមួយគត់ ដែលមិនបានបរិច្ចាគដល់បុព្វហេតុរបស់ពួកគេ ហើយបានផ្ញើតំណភ្ជាប់បរិច្ចាគ។ ទោះជាយ៉ាងណាក៏ដោយ ព័ត៌មានលម្អិតនៃគណនីនេះគឺមកពីប្រទេសផ្សេងគ្នាទាំងស្រុងដែលបានលើកទង់ក្រហម”។ 

នាយករដ្ឋមន្ត្រីថៃបានបន្តថា “ខ្ញុំស្ទើរតែជឿលើខ្លួនឯង ព្រោះពួកគេបានប្រើ AI ដើម្បីចម្លងសំឡេងមេដឹកនាំប្រទេសនោះយ៉ាងល្អឥតខ្ចោះ ដែលខ្ញុំបានឮនិយាយពីមុនមក។ ការបោកប្រាស់ទាំងនេះកាន់តែរីកចម្រើននិងគួរឲ្យកត់សម្គាល់”។ 

បន្តពីការប្រាប់ពីអ្វីដែលលោកស្រីបានជួបប្រទះដូចនេះហើយ ជាមួយគ្នានេះដែរ នាយករដ្ឋមន្ត្រីក៏បានព្រមានសាធារណជនអំពីការកើនឡើងនៃការឆបោកបែបនេះផងដែរ។ 

បន្ទាប់ពីការលើកឡើងទាក់ទងជាមួយនឹងករណីឆបោក ទៅលើលោកស្រីបែបនេះហើយ នាយករដ្ឋមន្ត្រីថៃ ក៏បានប្រគល់ភារកិច្ចឱ្យឧបនាយករដ្ឋមន្ត្រី និងជារដ្ឋមន្ត្រីសេដ្ឋកិច្ចឌីជីថល លោក Prasert Chanruangthong ធ្វើការស៊ើបអង្កេតទៅលើបញ្ហានេះដើម្បីធ្វើការស្រាវជ្រាវវែកមុខអ្នកដែលហ៊ានប្រព្រឹត្តនូវបទល្មើសនេះមកលើលោកស្រី ដោយកត់សម្គាល់ថា អ្នកបោកប្រាស់បានទាក់ទងលោកស្រី តាមរយៈកម្មវិធីផ្ញើសារបរទេសជាជាង លីង (Line) ។ 

ក្នុងនោះ អ្នកបោកប្រាស់ត្រូវបានគេរាយការណ៍ថា បានទទួលព័ត៌មានទំនាក់ទំនងរបស់លោកស្រីតាមរយៈអន្តរការី បន្ទាប់ពីបានកំណត់គោលដៅទៅលើបុគ្គលជាច្រើន។

ជាការឆ្លើយតប អគ្គស្នងការនគរបាលជាតិ នាយឧត្តមសេនីយ៍ កិត្តិព្រឹទ្ធបណ្ឌិត បានធ្វើការណែនាំដល់ អគ្គស្នងការនគរបាលជាតិ។ ឧត្តមសេនីយ៍ Tatchai Pitaneelaboot ដើម្បីធ្វើការស៊ើបអង្កេតឱ្យបានហ្មត់ចត់។ 

ប៉ូលីសភូមិន្ទថៃក៏កំពុងសម្របសម្រួលជាមួយប្រតិបត្តិករទូរគមនាគមន៍ ដើម្បីប្រើប្រាស់បច្ចេកវិទ្យាទំនើបក្នុងការតាមដានអ្នកបោកប្រាស់ទាំងនេះផងដែរ។ 

លើសពីនេះ អគ្គស្នងការនគរបាលជាតិក៏បានកំណត់ពេលជួបជាមួយប្រធានអង្គភាពនគរបាល ដែលពាក់ព័ន្ធក្នុងការដោះស្រាយបញ្ហាអ្នកបោកប្រាស់បរទេស រួមទាំងសកម្មភាពឧក្រិដ្ឋជនចិននៅក្នុងប្រទេសថៃផងដែរ។ 

ហើយសម្រាប់កិច្ចប្រជុំនេះនឹងធ្វើឡើងនៅថ្ងៃទី ២០ ខែមករា ខាងមុខនេះ នៅទីបញ្ជាការនគរបាលភូមិន្ទថៃ ដើម្បីបង្កើតយុទ្ធសាស្ត្រដោះស្រាយបញ្ហាទាំងនេះ។ 

នៅក្នុងការអភិវឌ្ឍន៍ពាក់ព័ន្ធជាមួយនឹងករណីឆបោកទៅលើនាយករដ្ឋមន្ត្រីថៃខាងលើនេះ ប៉ូលីសឧក្រិដ្ឋកម្មតាមអ៊ីនធឺណិតបានចាប់ខ្លួនជនសង្ស័យជាជនជាតិចិនម្នាក់ទៀត នៅទីក្រុងបាងកកកាលពីថ្ងៃទី ១៤ ខែមករា។ 

លោក Shaodong អាយុ ៤៩ ឆ្នាំត្រូវបានចាប់ខ្លួននៅផ្ទះល្វែងមួយក្នុងតំបន់ Ratchada ដែលធ្វើឱ្យគាត់ក្លាយជាជនជាតិចិនទីបីដែលត្រូវបានចាប់ខ្លួន ពាក់ព័ន្ធនឹងប្រតិបត្តិការឆបោកតាមទូរស័ព្ទដោយប្រើក្លែងក្លាយ។ 

មន្ត្រីនគរបាលបានសង្កត់ធ្ងន់ថា ឧប្បត្តិហេតុទាំងនេះបង្ហាញពីភាពទំនើបនៃប្រតិបត្តិការបោកប្រាស់ដែលផ្តោតលើពលរដ្ឋថៃ រួមទាំងឥស្សរជនជាន់ខ្ពស់និងបានជំរុញឱ្យសាធារណជនរក្សាការប្រុងប្រយ័ត្នចំពោះគម្រោងបោកប្រាស់បែបនេះផងដែរ។