វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃសុក្រថា ប្រធានាធិបតីចិន លោក ស៊ី ជីនពីង បានប្រាប់គាត់ថា ប្រទេសចិននឹងមិនឈ្លានពានកោះតៃវ៉ាន់ទេ ដរាបណាលោក Trump កំពុងកាន់តំណែង។ នេះបើតាមការចេញផ្សាយពីភ្នាក់ងារសារព័ត៌មាន រ៉យទ័រ នៅថ្ងៃទី១៦ សីហា ឆ្នាំ២០២៥។

លោក Trump បានធ្វើការអត្ថាធិប្បាយនៅក្នុងបទសម្ភាសន៍ជាមួយ Fox News មុនពេលការពិភាក្សាជាមួយប្រធានាធិបតីរុស្ស៊ី លោក Vladimir Putin ថា "ខ្ញុំនឹងប្រាប់អ្នក អ្នកដឹងទេ អ្នកមានរឿងស្រដៀងគ្នាជាមួយប្រធានាធិបតី Xi នៃប្រទេសចិន និងតៃវ៉ាន់ ប៉ុន្តែខ្ញុំមិនជឿថាមានវិធីណាមួយដែលវានឹងកើតឡើងនោះទេ ដរាបណាខ្ញុំនៅទីនេះ។" 

ត្រាំ បន្តថា "គាត់បានប្រាប់ខ្ញុំថា ខ្ញុំនឹងមិនធ្វើវាទេ ដរាបណាអ្នកជាប្រធានាធិបតី។ លោកប្រធានាធិបតី Xi បានប្រាប់ខ្ញុំពីរឿងនោះ ហើយខ្ញុំបាននិយាយថា ល្អណាស់ ខ្ញុំពេញចិត្តចំពោះរឿងនោះ។”

គួរបញ្ជាក់ថា ប្រទេសចិនចាត់ទុកកោះតៃវ៉ាន់ជាទឹកដីរបស់ខ្លួន ហើយបានប្តេជ្ញាថានឹងបង្រួបបង្រួមកោះនេះស្ថិតក្រោមការគ្រប់គ្រងរបស់ចិន ទោះជាយ៉ាងណាក៏ដោយ តៃវ៉ាន់ជំទាស់យ៉ាងខ្លាំងចំពោះការទាមទារអធិបតេយ្យភាពរបស់ចិន។

អ្នកនាំពាក្យស្ថានទូតអាមេរិកលោក Liu Pengyu បាននិយាយនៅក្នុងសេចក្តីថ្លែងការណ៍មួយថា "រដ្ឋាភិបាលសហរដ្ឋអាមេរិកគួរតែប្រកាន់ខ្ជាប់នូវគោលការណ៍ចិនតែមួយ និងសេចក្តីថ្លែងការណ៍រួមទាំងបីរបស់សហរដ្ឋអាមេរិក-ចិន ដោះស្រាយបញ្ហាទាក់ទងនឹងតៃវ៉ាន់ដោយប្រយ័ត្នប្រយែង និងការពារទំនាក់ទំនងចិន-សហរដ្ឋអាមេរិក និងសន្តិភាព រួមទាំងស្ថិរភាពនៅទូទាំងច្រកសមុទ្រតៃវ៉ាន់។" 

ម្យ៉ាងវិញទៀត បើទោះបីជាទីក្រុងវ៉ាស៊ីនតោន គឺជាអ្នកផ្គត់ផ្គង់អាវុធដ៏សំខាន់ និងជាអ្នកគាំទ្រអន្តរជាតិរបស់តៃវ៉ាន់ក៏ដោយ ក៏សហរដ្ឋអាមេរិក ដូចជាប្រទេសភាគច្រើនដែរ មិនមានទំនាក់ទំនងការទូតផ្លូវការជាមួយកោះនេះទេ៕