ថៃ៖ បន្ទាប់ពីមានការអំពាវនាវ ក្នុងបណ្តាញសង្គមថៃ ឱ្យបន្តអាណត្តិរបស់មេទ័ពភូមិភាគ២ លោក Paradorn អតីតអគ្គលេខាធិការក្រុមប្រឹក្សាសន្តិសុខជាតិ (NSC) ថៃ ព្រមានថា ការពន្យារពេលនេះ នឹងធ្វើឱ្យខូចដល់ប្រព័ន្ធយោធាថៃ។

ឧត្តមសេនីយ៍ឯក Paradorn Pattanathabutr បាននិយាយនៅថ្ងៃចន្ទ នេះថា លោកមិនយល់ស្របនឹងការអំពាវនាវជាសាធារណៈ ឱ្យរដ្ឋាភិបាលបន្តអាណត្តិរបស់ឧត្តមសេនីយ៍ឯក Boonsin Padklang ដែលនឹងត្រូវចូលនិវត្តន៍នៅចុងខែកញ្ញាខាងមុខនោះទេ។

តាមការចេញផ្សាយពីកាសែតថៃ The Nation នៅថ្ងៃទី១១ សីហា បានឲ្យដឹងថា អ្នកគាំទ្រនៅលើប្រព័ន្ធផ្សព្វផ្សាយសង្គមថៃជាច្រើន បានស្នើឱ្យបន្តអាណត្តិរបស់លោក Boonsin រហូតដល់ប្រាំឆ្នាំ ដោយសារតែពួកគេ មើលឃើញពីជំហរដ៏រឹងមាំរបស់គាត់ប្រឆាំងនឹងកងទ័ពកម្ពុជា។

ក្នុងបទសម្ភាសតាមទូរស័ព្ទជាមួយទូរទស្សន៍ Nation TV លោក Paradorn បាននិយាយថា "យើងមិនខ្វះបុគ្គលិកដែលមានគុណភាពទេ។ 

ប្រព័ន្ធនេះមានផែនការបន្តបន្ទាប់គ្នារួចហើយ។ យើងមិនគួរផ្តល់ទម្ងន់លើសដល់បុគ្គលណាមួយឡើយ ព្រោះវានឹងបំផ្លាញប្រព័ន្ធក្នុងរយៈពេលវែង។»

ឆ្លើយតបនឹងការលើកឡើងថា លោក Boonsin គួរតែបន្តអាណត្តិបន្ថែមទៀត លោក Paradorn បាននិយាយថា ថៃគួរតែបង្ហាញពីវិជ្ជាជីវៈ។

អតីតប្រធាន NSC ខាងលើ បន្តថា "នៅពេលដែលមនុស្សម្នាក់ចូលនិវត្តន៍ ម្នាក់ទៀតអាចជំនួសតំណែងរបស់គាត់ និងទទួលបានលទ្ធផលស្រដៀងគ្នា។ 

យើងបានរងទុក្ខរួចហើយនៅក្នុងនយោបាយ នៅពេលដែលយើងដាក់សារៈសំខាន់ខ្លាំងពេកលើបុគ្គល៕"