ថៃ៖ អាជ្ញាធរថៃបានរឹបអូសថ្នាំញៀន ប្រភេទ មេតំហ្វេតាមីន ជិត ១០ លានគ្រាប់ ក្នុងប្រតិបត្តិការត្រួតពិនិត្យតាមប៉ុស្តិ៍ត្រួតពិនិត្យមួយ កាលពីថ្ងៃទី១៤ ខែកុម្ភៈ នៅភាគខាងជើងប្រទេសថៃ ដោយឃាត់ខ្លួនជនសង្ស័យម្នាក់ ដែលត្រូវបានចោទថាមានគម្រោងដឹកជញ្ជូនថ្នាំញៀន ទៅខេត្តប៉ាធុំថានី ដើម្បីទទួលប្រាក់ឈ្នួល ១៥០,០០០ បាត។

កម្លាំងយោធាពី Pha Muang Task Force រួមជាមួយក្រុមសត្វឆ្កែបណ្តុះបណ្តាលពិសេស បានបញ្ឈប់រថយន្តដឹកទំនិញ ៦ កង់ មួយគ្រឿង នៅប៉ុស្តិ៍ត្រួតពិនិត្យក្នុងភូមិបាន់រិនលួង ស្រុក Chiang Dao District ខេត្តឈៀងម៉ៃ។

ក្នុងការត្រួតពិនិត្យ កម្លាំងសមត្ថកិច្ចបានរកឃើញថ្នាំញៀន ប្រហែល ៩.៩៧ លានគ្រាប់ ដែលលាក់ក្នុងបាវកែច្នៃចំនួន ៥០ បាវ នៅលើទ្រុងរថយន្ត ដោយគេចាក់ខាងលើដោយខ្ញីស្រស់ ដើម្បីបន្លំភ្នែកអាជ្ញាធរ។

ជនសង្ស័យបានសារភាពថា ត្រូវបានជួលឱ្យដឹកថ្នាំញៀនទៅក្បែរតំបន់ Talad Thai Market ស្ថិតក្នុងស្រុក Khlong Luang District ខេត្តប៉ាធុំថានី ដោយនឹងទទួលប្រាក់បន្ទាប់ពីដឹកជញ្ជូនដល់គោលដៅ។

វត្ថុតាង និងជនសង្ស័យត្រូវបានប្រគល់ឱ្យសមត្ថកិច្ចនៅអធិការដ្ឋាននគរបាលស្រុកឈៀងដាវ ដើម្បីចាត់ការតាមនីតិវិធីច្បាប់។

មន្ត្រីបានឱ្យដឹងថា ចាប់តាំងពីថ្ងៃទី០១ ខែតុលា ឆ្នាំ២០២៥ មក អាជ្ញាធរបានបង្ក្រាបករណីគ្រឿងញៀន ចំនួន ២២៩ ករណី ដោយរឹបអូសបានថ្នាំញៀន ជាង ១២៦ លានគ្រាប់ រួមទាំងសារធាតុញៀនប្រភេទផ្សេងៗទៀត ក្នុងយុទ្ធនាការប្រឆាំងគ្រឿងញៀនបន្តបន្ទាប់នៅភាគខាងជើងប្រទេសថៃ៕