ភ្នំពេញ៖ ចាប់ពី២០១៥មក ថវិកាប្រមាណជិត ១០ លានដុល្លារសហរដ្ឋអាមេរិក ត្រូវបានផ្តល់ដល់រដ្ឋបាលឃុំ-សង្កាត់ទូទាំងប្រទេស សម្រាប់ជួយផ្នែកហេដ្ឋារចនាសម្ព័ន្ធ ទឹក វិស័យអប់រំ និងសុខាភិបាល។ នេះជាមូលនិធិរ៉ែទ្រទ្រង់កិច្ចអភិវឌ្ឍសហគមន៍ ហៅថា “មូលនិធិរ៉ែ” ដែលជាវិភាគទានស្ម័គ្រចិត្តពីប្រតិបត្តិកររ៉ែ បង្កើតឡើងនៅឆ្នាំ២០១៥ ដោយសម្តេចតេជោ ហ៊ុន សែន និងបន្តពង្រីកដោយសម្តេចធិបតី ហ៊ុន ម៉ាណែត សំដៅជួយជ្រោមជ្រែងមូលដ្ឋានទូទាំងប្រទេស។

នេះបើតាមការបញ្ជាក់ របស់លោក កែវ រតនៈ រដ្ឋមន្ត្រីក្រសួងរ៉ែ និងថាមពល នាព្រឹកថ្ងៃសុក្រ ទី២៩ ខែសីហា ឆ្នាំ២០២៥នេះ នៅលើបណ្តាញសង្គមផ្លូវការរបស់លោក។

បើតាមក្រសួងរ៉ែ បានឱ្យដឹងថា លុយមូលនិធិរ៉ែទ្រទ្រង់កិច្ចអភិវឌ្ឍន៍សហគមន៍មូលដ្ឋាន ដែលហៅកាត់ថា “មូលនិធិរ៉ែ” ត្រូវបានបង្កើតឡើងក្នុងឆ្នាំ២០១៥ ក្រោមការដឹកនាំដ៏ឈ្លាសវៃ របស់ សម្តេចតេជោ ហ៊ុន សែន និងបន្តពង្រីកដោយសម្តេចធិបតី ហ៊ុន ម៉ាណែត សំដៅជួយជ្រោមជ្រែងមូលដ្ឋានទូទាំងប្រទេស។ ចាប់តាំងពីឆ្នាំ២០១៥មក ថវិកាជិត ១០ លានដុល្លារ ត្រូវបានផ្តល់ដល់ឃុំ-សង្កាត់ទូទាំងប្រទេសសម្រាប់ជួយផ្នែកហេដ្ឋារចនាសម្ព័ន្ធ ទឹក វិស័យអប់រំ និងសុខាភិបាល។

ក្រសួងរ៉ែ និងថាមពល បានបញ្ជាក់ថា វិស័យរ៉ែសំណង់ បានដើរតួនាទីយ៉ាងសំខាន់ក្នុងការផ្គត់ផ្គង់វត្ថុធាតុដើម មានថ្មសំណង់ គ្រួស ខ្សាច់ ឡាតេរឹត សម្រាប់បម្រើការសាងសង់ហេដ្ឋារចនាសម្ព័ន្ធផ្លូវថ្នល់ អគ្គីសនី កំពង់ផែ អាកាសយានដ្ឋាន ស្ពាន វារីអគ្គិសនី ទំនប់ធារាសាស្ត្រ និងសំណង់នានាដទៃទៀតទូទាំងប្រទេស។ ផលិតផលស៊ីម៉ងត៍ ដែលកម្ពុជាធ្លាប់តែធ្វើការនាំចូលទាំងស្រុង កាលពីអំឡុងទស្សវត្សរ៍ឆ្នាំ២០០០ ឥឡូវនេះត្រូវបានជំនួសវិញ ដោយផលិតផលស៊ីម៉ងត៍ក្នុងស្រុកដែលឆ្លើយ តបបានតាមតម្រូវការសាងសង់នានា និងឈានទៅរកការនាំចេញទៅក្រៅប្រទេសទៀតផង។ ចំណែកឯ ឧស្សាហកម្មអាជីវកម្មរ៉ែមាសកម្រិតអន្តរជាតិបានរលេចចេញជារូបរាងកាលពីឆ្នាំ២០២១ ស្របតាមគោលនយោបាយជាតិស្តីពីធនធានរ៉ែ។

ការអភិវឌ្ឍនធនធានរ៉ែខាងលើនេះមុនឆ្នាំ១៩៩៨ កម្ពុជាមិនអាចធ្វើការអភិវឌ្ឍបានទេ ដោយសាររបបវាលពិឃាត និងសង្គ្រាមស៊ីវិល។ លុះក្រោយឆ្នាំ១៩៩៨ បន្ទាប់ពីយើងទទួលបានសុខសន្តិភាពពេញលេញ ក្រោមគោលនយោបាយ “ឈ្នះ-ឈ្នះ” របស់ សម្តេចតេជោ ហ៊ុន សែន បានធ្វើឱ្យខឿនសេដ្ឋកិច្ច និងសង្គមរបស់ប្រទេសកម្ពុជាមានការរីកចម្រើនគ្រប់វិស័យ ក្នុងនោះវិស័យរ៉ែ បានចាប់ផ្តើមមានសកម្មភាពអភិវឌ្ឍន៍គួរជាទីមោទនៈ ទោះបីជាវិស័យរ៉ែនៅកម្ពុជានៅក្មេងខ្ចី ក៏កម្ពុជាបានខិតខំប្រឹងប្រែង អភិវឌ្ឍវិស័យនេះ តាមរយៈការទាក់ទាញវិនិយោគិន និងបានបង្កើតប្រភពចំណូលថ្មីបន្ថែមគួរឱ្យកត់សម្គាល់ទន្ទឹមនឹងភាពរីកចម្រើនយ៉ាងឆាប់aរហ័សក្នុងវិស័យរ៉ែ កាលពីឆ្នាំ២០១៥ ក្រោមការដឹកនាំដ៏ឈ្លាសវៃ របស់ សម្តេចអគ្គមហាសេនាបតីតេជោ ហ៊ុន សែន ក៏បានផ្តួចផ្តើមឱ្យក្រសួងរ៉ែ និងថាមពលយកចិត្តទុកដាក់ និងគិតគូរពីផលប្រយោជន៍ជូនប្រជាពលរដ្ឋដែលរស់នៅជាប់ពាក់ព័ន្ធនឹងតំបន់វិនិយោគធនធានរ៉ែ ដោយផ្ទាល់បន្ថែមទៀត តាមរយៈការចូលរួមអភិវឌ្ឍន៍ក្នុងសហគមន៍មូលដ្ឋានបន្ថែមពីលើគម្រោងអភិវឌ្ឍថ្នាក់ជាតិ។ ក្នុងឆ្នាំ២០១៥ ក្រសួងរ៉ែនិងថាមពល ដោយមាន លោក ស៊ុយ សែម ជារដ្ឋមន្ត្រី បង្កើតមូលនិធិឈ្មោះថា “មូលនិធិទ្រទ្រង់កិច្ចអភិវឌ្ឍន៍សហគមន៍មូលដ្ឋាន” និងបានប្រើប្រាស់មូលវិពីនេះ ប្រកបដោយតម្លាភាពសម្រាប់គោលដៅចូលរួមកសាងហេដ្ឋារចនាសម្ព័ន្ធក្នុងមូលដ្ឋានដែលបនគម្រោង ធនធានរ៉ែស្ថិតនៅក្រោមការដឹកនាំបន្តដ៏ឈ្លាសវៃរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បាននាំមកនូវស្ថិរភាពនយោបាយ សន្តិសុខរឹងមាំ ប្រជាពលរដ្ឋមានកម្រិត ជីវភាពកាន់តែល្អប្រសើរឡើង និងបានណែនាំឱ្យក្រសួងរ៉ែ និងថាមពល ត្រូវបន្តប្រើប្រាស់មូលនិធិរ៉ែឱ្យកាន់តែមានប្រសិទ្ធភាព និងតម្លាភាព។ គិតត្រឹមខែកក្កដា ឆ្នាំ២០២៥ ក្រសួងរ៉ែនិ ងថាមពល បានប្រើប្រាស់ មូលនិធិរ៉ែ ចូលរួមកសាងហេដ្ឋារចនាសម្ព័ន្ធក្នុងមូលដ្ឋានទូទាំងប្រទេសបាន ចំនួន ៩៩ គម្រោង ដែលចំណាយថវិកាអស់ ប្រមាណ ៦,៥ លានដុល្លារអាមេរិក និងមាន ៣១ គម្រោង ទៀតគ្រោងនឹងអនុវត្តក្នុងឆមាសទី២ ឆ្នាំ២០២៥ នេះ ដែលគិតជាថវិកាប្រមាណជាង ២,៦ លានដុល្លារអាមេរិក បន្ថែមទៀត។

ក្រសួងរ៉ែ និងថាមពល ប្តេជ្ញាបន្តគ្រប់គ្រង និងប្រើប្រាស់ “មូលនិធិរ៉ែ” សំដៅដល់ការចូលរួមកសាងហេដ្ឋារចនាសម្ព័ន្ធក្នុងមូលដ្ឋានដែលមានគម្រោងវិនិយោគធនធានរ៉ែស្ថិតនៅឱ្យមានប្រសិទ្ធភាព និងតម្លាភាព៕