ឧត្ដរមានជ័យ៖ ព្រឹកថ្ងៃទី២៩ ខែសីហា ឆ្នាំ២០២៥ ក្រុមអ្នកសារព័ត៌មានមកពីប្រទេសចិន សិង្ហបុរី ឥណ្ឌូនេស៉ី ម៉ាឡេស៉ី វៀតណាម ព្រមទាំងអ្នកសារព័ត៌មានកម្ពុជា ជាច្រើននាក់ បានចុះយកព័ត៌មាន និងធ្វើបទសម្ភាសជាមួយថ្នាក់ដឹកនាំពាក់ព័ន្ធនៅទីតាំងជាច្រើន រួមទាំងទីប្រជុំជន ដែលរងការបំផ្លិចបំផ្លាញដោយគ្រាប់ផ្លោង និងការទម្លាក់គ្រាប់ពីយន្តហោះរបស់កងទ័ពថៃ នាពេលកន្លងមក នៅខេត្តឧត្តរមានជ័យ ដែលនេះ គឺជាបេសកកម្មនៃការបង្ហាញការពិតពីទីតាំងដែលទទួលរងគ្រោះ។

ការផ្តល់កិច្ចសម្ភាសន៍ដល់អ្នកសារព័ត៌អន្តរជាតិ និងជាតិ រួមមាន លោក មាន ចាន់យ៉ាដា អភិបាលខេត្តឧត្តរមានជ័យ តំណាងក្រសួងព័ត៌មាន លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក នៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានដឹកនាំសម្របសម្រួលដល់អ្នកសារព័ត៌មានអាស៊ាន ដើម្បីចុះយកព័ត៌មានដោយផ្ទាល់នៅទីតាំងទម្លាក់គ្រាប់បែក មកលើផ្ទះប្រជាពលរដ្ឋ នៅក្នុងភូមិផ្អុង សង្កាត់កូនក្រៀល ក្រុងសំរោង ខេត្តឧត្ដរមានជ័យ។

ចំពោះទីតាំងដែលក្រុមអ្នកយកព័ត៌មានអាស៊ានចុះទៅផ្ទាល់នោះ រួមមាន កន្លែងគ្រាប់កាំភ្លើងធំ ប្រភេទ ១០៥ មីលីម៉ែត្រ ១២៧ មីលីម៉ែត្រ និង ១៥៥ មីលីម៉ែត្រ បានផ្លោងដាក់ភូមិឋានប្រជាពលរដ្ឋស៉ីវិល និងបន្តចុះពិនិត្យជាក់ស្តែងទីតាំងគ្រាប់បែក MK-84 និង MK-82 មានទម្ងន់ជិត ១តោន  ដែលកងទ័ពថៃទម្លាក់ពីលើយន្តហោះចម្បាំង F-16 លើផ្ទះប្រជាពលរដ្ឋក្នុងភូមិថ្មដូន ឃុំគោកមន ស្រុកបន្ទាយអំពិល ព្រមទាំងមណ្ឌលសុខភាព សាលារៀនដែលខូចខាតដោយសារគ្រាប់បែករបស់កងទ័ពថៃ លើទីតាំងជនស៉ីវិលមួយចំនួនទៀត។

លោក ហេង រតនា អគ្គនាយក «ស៊ីម៉ាក់» បានធ្វើបទបង្ហាញពីគ្រោះថ្នាក់ និងផលប៉ះពាល់បណ្តាលមកពីគ្រាប់បែកធុនធំកងទ័ពថៃ ដែលបានផ្លោងដាក់លំនៅឋានរបស់ប្រជាជនជូនដល់អ្នកសារព័ត៌មានមកពីតំបន់អាស៉ី និងផែនការសកម្មភាពបោសសម្អាត និងបន្សាបគ្រាប់បែកធុនធំដែលមានបង្កប់ដោយផ្សែងពុលធ្វើឱ្យប៉ះពាល់សុខភាពយ៉ាងធ្ងន់ធ្ងររបស់ប្រជាពលរដ្ឋ។

សូមជម្រាបថា ក្រសួងព័ត៌មាន បានរៀបចំសិក្ខាសាលាថ្នាក់តំបន់ ស្តីពី «ការគ្រប់គ្រងសុវត្ថិភាព និងហានិភ័យក្នុងការរាយការណ៍ស្តីពីជម្លោះ» Safety and Risk Management Conflict Reporting ចាប់ពីថ្ងៃទី២៨ ដល់ថ្ងៃទី៣១ ខែសីហា ឆ្នាំ២០២៥ ដែលមានអ្នកសារព័ត៌មានមកពី ចំនួន ០៦ ប្រទេស រួមមាន ឥណ្ឌូនេស៊ី ម៉ាឡេស៊ី វៀតណាម ចិន សឹង្ហបុរី និងកម្ពុជា ដែលប្រព្រឹត្តនៅខេត្តសៀមរាប៕