ភ្នំពេញ៖ ជនសង្ស័យ ចំនួន ០២នាក់​ ដែលធ្វើសកម្មភាពឆក់ទូរសព្ទពីស្ដ្រីម្នាក់ កំពុងជិះម៉ូតូបានសម្រេច​ ត្រូវកម្លាំងនាយកដ្ឋានគរបាលព្រហ្មទណ្ឌអគ្គស្នងការដ្ឋាននគរបាលជាតិដេញប្រផាប់ចាប់ប្រភីង បង្រ្កាបភ្លាមៗ ឃាត់ខ្លួនយកមកសាកសួរ និងកសាងសំណុំរឿងបញ្ជូនទៅកាន់តុលាការ។

ជនសង្ស័យទាំង០២នាក់ ដែលសមត្ថកិច្ចបង្ក្រាបបាន មានឈ្មោះ​ ឈាង​ ឆៃ ភេទប្រុស អាយុ ៣២ឆ្នាំ ជនជាតិខ្មែរ ទីលំនៅមិនពិតប្រាកដ​ មុខរបរមិនពិតប្រាកដ​ និងឈ្មោះ​ ស្ទាំង​ រាជសី​ ភេទប្រុស​ អាយុ៣៨ឆ្នាំ​ ជនជាតិខ្មែរ​ ទីលំនៅមិនពិតប្រាកដ​ មុខរបរមិនពិតប្រាកដ​។ 

នគរបាលបានឱ្យដឹងថា នៅថ្ងៃទី០៣ ខែមិថុនា ឆ្នាំ២០២៥ វេលាម៉ោង ​០០និង២០នាទីរំលងអាធ្រាត្រ លោកឧត្តមសេនីយ៍ត្រី​ ប៊ុត​ វណ្ណារដ្ឋ​ ដឹកនាំកម្លាំងជំនាញនាយកដ្ឋាន​ ល្បាតក្នុងភូមិសាស្រ្ត​រាជធានីភ្នំពេញ​ មកដល់ត្រង់ចំណុច​មុខផ្សារដេប៉ូ ផ្លូវលេខ២១៥ សង្កាត់ផ្សារដេប៉ូ៣​ ខណ្ឌ៧មករា រាជធានីភ្នំពេញ​ ក៏ប្រទះឃើញជនសង្ស័យ​ចំនួន ០២នាក់​ ជិះម៉ូតូ ចំនួន ០១គ្រឿង​ បានធ្វើសកម្មភាពឆក់ទូរសព្ទ​ពីស្រី្តរងគ្រោះ​កំពុងជិះម៉ូតូបានសម្រេច​។

ភ្លាមៗនោះ កម្លាំងជំនាញ ក៏បានធ្វើការប្រដេញមកដល់ត្រង់ចំណុចមុខសាលាវត្តកោះ​ ផ្លូវមុនីវង្ស​ ខណ្ឌដូនពេញ​ រាជធានីភ្នំពេញ​ ទើបឃាត់ខ្លួនបានុំ សម្ភារៈដកហូតមាន៖ ទូរសព្ទម៉ាក​ tecno spark ពណ៌ខ្មៅ (របស់ជនរងគ្រោះ) និងម៉ូតូ ចំនួន ០១គ្រឿង​ ម៉ាក​ ហុងដា​ សង់សេ១២៥​ ពណ៌ទឹកប្រាក់ មិនស្គាល់ឆ្នាំផលិត​ គ្មានស្លាកលេខ​។

បច្ចុប្បន្ន​កម្លាំងជំនាញកំពុងសាកសួរ និងកសាងសំណុំរឿងតាមនីតិវិធី៕